बेलबारी, ५ श्रावण। कोरोना भाइरसका कारण विद्यार्थीहरूको पठन पाठनमा असर पुगेपछि मोरङको बेलबारी नगरपालिकाले पठन पाठनलाई सहज बनाउन ५० स्थानमा फ्रि वाईफाई जडान गरेको छ ।
वैकल्पिक विधिबाट पठनपाठन गर्न लागि सहजहोस् भन्ने उद्देश्यका साथ एउटा वडामा ४ ठाउँमा जडान गरिएको नगर प्रमुख ज्ञानेन्द्र सुवेदीले बताए । फ्रि वाईफाई जडान भएपछि इन्टरनेट पहुँच भन्दा बाहिर रहेको विद्यार्थीहरुलाई पठन पाठनमा सहज हुने नगरपालिकाले विश्वास लिएको छ ।
नगरपालिकाका ५ वटा विद्यालयलाई भर्चुअल कक्षाको हब बनाएर पठन पाठन गरिने नगरपालिका शिक्षा शाखाका प्रमुख भूपेन्द्र कोइराला बताउँछन् । ५ वटा विद्यालयमा सबै विद्यालयका शिक्षक शिक्षिका भेला भएर अनलाइनको माध्यमबाट सिकाइ सुरु गर्ने कार्यक्रम रहेको कोइरालाको भनाई रहेको छ । अनलाइनको पहुँच नपुगेका विद्यार्थीहरूका लागि सियुजि सिम उपलब्ध गराइएको नगर प्रमुख सुवेदीले बताए ।
सुवेदीका अनुसार उक्त सिम कार्ड मार्फत एक जना शिक्षकले ६ जना विद्यार्थीलाई एकै पटक पढाउन मिल्ने छ । उक्त सिमको प्रयोगबाट सामान्य खालका मोबाइलबाट समेत पठन पाठन गर्न मिल्ने नगरपालिकाको कार्यालयले जनाएको छ ।
अनलाइन पहुँचका अभावमा धेरै बालबालिकाहरू सिकाइबाट वञ्चित भइरहेको अवस्थामा बेलबारीले सुरु गरेको यो कामलाई स्थानीयले सकारात्मक रूपमा लिएका छन् ।
